Parcourstraining 3. April 2010

Für alli wo Zyt und Luscht kha hän und wo au scho e Parcours laufe könne, han i am 3. April 2010 e Parcourstraining abote.

Am Start sin gsi:

Andrea & Jara, Alessia & Luna, Gabi & Lulu, Käthi & Jenny, Pam & Flame, Rita & Luna, Sarina & Q, Ursi & Enya, Yvonne & Miro, I & Peace

Do alli äntwäder Agility zum Plausch mache oder no gar nit Wettkampfrief sin oder im A starte han i z'erscht e biz e schwerere 1er Parcours gstellt. Bis uf e paar kleini individuelli Fehler hän alli Teams dä Parcours mit Bravour gmeischteret. Vor allem d'Arbet an de Zone isch vorbildlich gsi und es het riesig Spass gmacht zum zueluege. Bi ächt mega stolz uf euch!

Dr zweiti Parcours isch denn e typische A-Parcours gsi - schnäll und diräkt - und alli hän dä souverän absolviert. D'Schlusssequänz het zwar mehr an e 100m-Sprint erinneret, aber alli hän alles gäh zum ihre Hund übere Schlusssprung z'fiehre.

S'Fazit vo allne, mir wärde das sicher wiederhole!

Dr Peace und i hän nach dere lange Pause au wieder emol zäme Agi gmacht und es het mega gfägt. Unglaublich wie sicher dr Peace nach jedere Pause wieder im Parcours lauft. Es macht eifach riesig Spass mit ihm. Wenn är einigermasse stabil bliebt, mache mir villicht doch no e paar Wettkämpf zäme - mol luege :-))